Violet L.M. Ravenstein-Lourens a nasé dia 28 di yüni 1949 na Kòrsou. el a gradua na 1970 komo maestro di skol. El a traha shete aña komo dosente dilanti di klas, bintikuater aña komo kabes di skol i ocho aña komo Funshonario di enseñansa.
For di edat hóben e tabata gusta skirbi kuenta kòrtiku i poesia. e tin algun kolekshon di poesia riba su nòmber, ku ta Un gota di sanger, Bida i Mama. Banda di esakinan e tin un seri di tres buki di inpirashon, esta, Grandi, Mi guia diario i Afirmashonnan. Kada un ta kontené shen inspirashon. Hopi bia hende ta aserká Viola pa skirbi poemanan pa okashon special, manera selebrashon, apertura i tambe spich, introdukshon i orashon. Ademas ta pidi’é pa skirbi inspirashonnan kòrtiku pa riba karchi pa diferente okashon.
“Ami, un muhé”, ta un kolekshon di historia i testimonio di shen hende muhé lokal di diferente edat. Ku esakinan e ke habri wowo di e hende muhé, dun’é un empuhe pa e lanta para fuerte i defendé su dignidat. Tambe e ke pa enfatisá e ròl importante ku e hende muhé tin den kas i eifó den komunidat i duna bèrdadero balor na esaki. Viola ta deseá pa e hóben usa e historia i testimonionan komo un guia p’e, pa e ta é hende muhé di futuro: esun ku ta respetá i balorá su mes, ta tene su dignidat i moral na haltu, tin konsenshi i ta un ehèmpel serio pa otro.
