Nydia Ecury a nase na Aruba na aña 1926. Despues di MULO, el a traha na refineria di Lago i a studia na Canada. Na 1957 el a bin biba na Kòrsou. For di 1959, e tabata aktivo komo aktris, direktor i traduktor di obranan di dramaturgo di fama internashonal, entre otro: Goldoni, Tennessee Williams, Jean Genet, Alonso Paso i William Shakespeare. Den deklamashon di prosa i poesia, Nydia ta laga disiplina di teatro, literratura i muzik komplementá otro.
Esaki ta su di seis kolekshon di poesia. El a representá Antia Hulandes mas di 20 bes durante festival i kongreso literario den region di Caribe, na Venezuela, na Merka i varios bes na Hulanda. Na 1984 el a deklamá den “Nieuwe Kerk” na Amsterdam den presensia di S.M. Lareina Beatrix. Su “one-woman show” Luna di Papel di aña 1980 tabatin ripitishon nostálgiko na aña 2000. Salsbach Jazz Trio a pèrkurá pa kompañamentu musikal.
Vários universidat na Merka a publiká su obranan, na ingles i papiamentu. Entre otro Universidat Internashonal di Florida, Universidat di Virginia, Universidat di New York i John Madison University di Harrisonburg, Va. Profeshonalmente e ta dosente ingles di nivel sekundario.
E ta mama di Alexander Isings I Caresse Isings i wela di tres nietu, Marc Richard, Walter Alexander i Matthew Alexander. Durante 44 aña di kontribushon kultural, Nydia Ecury a risibí vários premio i dos kondekorashon real.
