Denara ta un hóben adolesente ku ta biba huntu ku su mayornan den un landhùis ku ta parti di un paisahe divino. Denara su kompaño di mas grandi ta su kachó, Bòbi. No opstante un bida ideal, hopi biaha e ta sinti un soledat immenso ta yam’é komo ku tiki ta komprendé e bashí ku e sa sinti.
Riba un dia ku Denara a denominá komo un di e dianan di mas laf di su bida, sin pensa e ta enkontrá su mes den un aventura remarkabel. E ta deskubrí un mundu skondí ku nunka e por a ni imaginá su mes ku ta eksistí.
Kriaturanan místiko I deskonosí ta aparesé riba su kaminda i mas e sera konosí ku e mundu skondí akí, mas na kas e ta sinti su mes. Huntu Denara i e kriaturanan ta sigui un trayekto en buska di un tesoro bon skondí.
