Fundacion CINEARUBA su proyecto Kids Report ta presentando su expo ‘Conta mi bo storia’ na Biblioteca Nacional Oranjestad. Kids Report ta un proyecto cu ta enfoca riba educacion di arte y cultura.
E ta un proyecto cu un duracion di tres aña. Durante su prome aña alumnonan di cuater scolnan basico a ricibi diferente tayernan entre otro tayer di pinta, ilustracion, musica, zonido/naracion y fotografia. E tema principal di cada tayer tabata contamento di storia unda cu pa medio di diferente disciplina di arte e alumnonan tabata crea nan propio storianan.
E scolnan cu ta participando na e proyecto aki ta Prinses Amalia Basischool, Pius X school, Sint Franciscus College y Colegio Santa Famia. E proyecto ta forma parti di e curriculum di e scolnan y e tayernan ta wordo duna durante orarionan di scol. Durante e expo por mira trabaonan realisa pa cada alumno di cada scol. E alumnonan a ricibi guia for di e instructornan cu ta consisti di Adriano Fernandes cu a duna tayer di musica y con pa conta storia cu zonido/naracion y Steffen Maas cu a duna tayernan di pinta y ilustracion.
E proyecto lo sigui cu e mes un alumnonan den cinco y di seis klas. E presentacion final lo consisti di diferente mini-documentario over di cultura, arte y deporte realisa pa e propio alumnonan. E proyecto Kids Report ta posibel danki na e apoyo di Fonds voor Cultuurparticipatie, Unoca, Prins Bernhard Cultuurfonds Caribisch Gebied, Cede Aruba, Web Aruba, VNO, DCA, Aruba ABC, Biblioteca Nacional Oranjestad y tur e scolnan cu ta participando.
E expo lo ta accesibel for di dialuna 6 di juli te cu diaranson 19 di augustus, e ultimo dia prome cu scol habri bek. Mayornan por bishita e expo conhunto cu nan yiunan durante e vacacion escolar na Biblioteca Nacional Oranjestad durante e orarionan normal di Biblioteca.
